The Rana Daggubati Talk Show: బాలయ్య బాబుకు పోటీగా రానా దగ్గుపాటి టాక్ షో

The Rana Daggubati Talk Show: టాలీవుడ్ ప్రముఖ హీరో, ప్రొడ్యూసర్ రానా దగ్గుబాటి ఈ సారి సరికొత్తగా ది రానా దగ్గుబాటి టాక్ షోతో ప్రేక్షకుల ముందుకు రాబోతున్నారు. ఈ షో నవంబర్ 23 నుంచి ప్రముఖ ఓటీటీ అయిన అమెజాన్ ప్రైమ్ వీడియోస్‌లో ప్రసారం కానుంది. ఈ టాక్ షోను రానా దగ్గుబాటి స్పిరిట్ మీడియా బ్యానర్‌పై ప్రొడ్యూస్ చేస్తున్నారు.

లోకల్, నేషనల్ అనే తేడా లేకుండా అనేక షోలకు హోస్ట్ చేసి మంచి వక్తగా రానా దగ్గుబాటి పేరు తెచ్చుకున్నారు. ఈ నేపథ్యంలోనే రానా మరోసారి తన సొంత టాక్ షోతో మనందరినీ సర్ప్రైజ్ చేయబోతున్నాడు. ఈ షో నవంబర్ 23న స్ట్రీమింగ్ కానున్నట్టు తాజాగా ప్రైమ్ వీడియో వెల్లడించింది. మీకు తెలిసిన స్టార్లు.. మీకు తెలియని స్టోరీలు... ది రానా దగ్గుబాటి షో చూడడానికి సిద్ధంగా ఉండండి. నవంబర్ 23న ప్రీమియర్ కానుంది అనే క్యాప్షన్‌తో సదరు ఓటీటీ ఈ విషయాన్ని ఎక్స్ అకౌంట్ ద్వారా తెలియజేసింది.

ఇప్పటి వరకు ఎన్నో సెలబ్రిటీ టాక్ షోలు వచ్చినా ఇది మాత్రం వాటికి పూర్తి భిన్నంగా ఉండబోతోందని ప్రైమ్ వీడియో చెబుతోంది. రానాతో కలిసి సెలబ్రిటీలు తమ వ్యక్తిగత జీవితాల గురించి ఇప్పటి వరకు తెలియని విశేషాలను పంచుకోబోతున్నట్టు తెలిపింది. ఈ సిరీస్‌లో మొత్తం 8 ఎపిసోడ్లు ఉండనున్నాయి. ఇందులో సెలబ్రిటీలు తమ వ్యక్తిగత జీవితాల గురించి ఇప్పటి వరకు తెలియని విశేషాలను పంచుకోబోతున్నట్టు తెలిపింది.

ది రానా దగ్గుబాటి షోకు టాలీవుడ్‌‌లోని ప్రముఖులు ఎంతో మంది రాబోతున్నారు. అందులో దుల్కర్ సల్మాన్, నాగ చైతన్య, సిద్దూ జొన్నలగడ్డ, నాని, రాజమౌళి, శ్రీలీల, రామ్ గోపాల్ వర్మ లాంటి వాళ్లు ఉండడం విశేషం. దీంతో ఈ టాక్ షోపై ఆసక్తి నెలకొంది. ఎవరూ ఊహించని ఎన్నో విషయాలు ఈ షో ద్వారా తెలుస్తాయని రానా చెప్పడం విశేషం. ఈ షో గురించి తాను చాలా ఆసక్తిగా ఎదురు చూస్తున్నట్టు చెప్పాడు. అయితే తొలి వారం వచ్చే గెస్ట్ ఎవరన్న సస్పెన్స్ ప్రేక్షకుల్లో నెలకొంది. నవంబర్ 23 నుంచి ప్రతి శనివారం ఒక ఎపిసోడ్ ప్రైమ్ వీడియోలోకి వస్తుంది.

గతంలో నంబర్ 1 యారీకి హోస్ట్‌గా వ్యవహరించిన రానా.. పలువురు సెలబ్రెటీలతో సందడి చేసి అలరించాడు. తనదైన సెన్సాఫ్ హ్యూమర్, సెటైరికల్ కామెడీతో అందరినీ ఆకట్టుకున్నాడు. ఈ క్రమంలోనే ఆయన అనేక అవార్డ్స్ ఈవెంట్స్‌లో హోస్ట్‌గా వ్యవహరిస్తున్నాడు. దీంతో ప్రముఖ ఓటీటీ సంస్థ అమెజాన్ ప్రైమ్ వీడియో రానాతో జతకట్టి సరికొత్త టాక్ షో ప్రారంభించనుంది. అదే ది రానా దగ్గుబాటి షో. మరోవైపు నందమూరి బాలకృష్ణ హోస్ట్‌గా చేస్తున్న అన్‌స్టాపబుల్ షో ఆడియన్స్‌ని బాగానే ఆకట్టుకుంటోంది. అన్‌స్టాపబుల్ షో ప్రముఖ ఓటీటీ ఆహాలో ప్రసారమవుతోంది. అయితే అన్‌స్టాపబుల్ షో వరల్డ్‌లోనే అత్యంత పాపులర్ టాక్ షోస్‌లో 18వ స్థానంలో నిలిచింది. మరి రానా చేయబోయే టాక్ షో ఆడియన్స్‌ను ఎలా అలరిస్తుందో చూడాలి మరి.