November 2024: ఈ నెలలో థియేటర్లలో, ఓటీటీలో సినిమాల జాతర.. ఆడియెన్స్‌కు ఇక పండగే పండగ.. ఫుల్ డీటెయిల్స్

Matka, Kanguva to Allu Arjun Unstoppable show, Movies & OTT Releases This November: ఈ నవంబర్ నెల సినీ ప్రియులకు ఫిలిం ఫెస్టివల్ కానుంది. ఎందుకంటే, ఈ నెలలోనే కొన్ని పెద్దపెద్ద సినిమాలు థియేటర్లకు క్యూ కడుతున్నాయి. అలాగే ఇటీవల రిలీజైన ఇంకొన్ని హిట్ సినిమాలు కూడా ఇదే నెలలో ఓటిటి ప్లాట్‌ఫామ్స్‌లోకి వచ్చేస్తున్నాయి. అందులో తెలుగు సినిమా ఆడియెన్స్ ఎప్పుడెప్పుడా అని ఎదురుచూస్తోన్న సినిమాలు కూడా ఉండటం విశేషం. ఇంతకీ ఆ భారీ చిత్రాల జాబితా ఏంటి, ఏయే సినిమాలు ఆడియెన్స్ ముందుకొచ్చేందుకు రెడీ అయ్యాయో ఇప్పుడు చూద్దాం.

మట్కా

వరుణ్ తేజ్ హీరోగా కరుణ కుమార్ డైరెక్ట్ చేసిన సినిమా మట్కా. పీరియాడిక్ డ్రామా నేపథ్యంతో తెరకెక్కిన ఈ సినిమాలో వరుణ్ తేజ్ డిఫరెంట్ షేడ్స్ లో కనిపించనున్నాడు. 1958 లో బర్మా నుండి బతుకుదెరువు కోసం పొట్టచేతపట్టుకుని వైజాగ్ వచ్చిన వాసు అనే కుర్రాడు సముద్ర తీరాన మట్కా కింగ్ గా ఎలా ఎదిగాడనేదే ఈ సినిమా స్టోరీ. ఇటీవల రిలీజైన మట్కా ట్రైలర్‌లో వరుణ్ తేజ్ గ్లింప్స్ చూస్తోంటే ఈ సినిమా కోసం ఎంత కష్టపడ్డాడో అర్థం అవుతుంది. వరుణ్ తేజ్ సరసన మీనాక్షి చౌదరి ఈ సినిమాలో హీరోయిన్ గా నటించింది. తీగల విజయేందర్ రెడ్డి, తాళ్లూరి రజని నిర్మించిన మట్కా మూవీ నవంబర్ 14న వర్డ్ వైడ్ గా థియేటర్లలోకి రానుంది.

కంగువ

సూర్య నటించిన లేటెస్ట్ మూవీ కంగువ. వీరం, వెదలం, వివేకం, విశ్వాసం వంటి హిట్ చిత్రాలను డైరెక్ట్ చేసిన శివ తెరకెక్కించిన ఈ సినిమాలో బాబి డియోల్, దిషా పటాని ఇతర ప్రధాన పాత్రలు పోషిస్తున్నారు. కేఈ జ్ఞానవేల్ రాజ, వంశీ, ప్రమోద్ కలిసి సంయుక్తంగా నిర్మిస్తున్న ఈ సినిమా కూడా నవంబర్ 14నే థియేటర్లలోకి రానుంది. ప్రపంచవ్యాప్తంగా దాదాపు 10 వేలకు పైగా థియేటర్లలో ఈ సినిమా విడుదల కానుంది. ఇప్పటికే ఈ సినిమాపై భారీ అంచనాలు ఉన్నాయి. ఇటీవలే రిలీజైన కంగువ ట్రైలర్ ఆ అంచనాలను రెట్టింపు చేసింది.

ఫ్రీడం ఎట్ మిడ్‌నైట్

ఫ్రీడం ఎట్ మిడ్‌నైట్ అనే వెబ్ సిరీస్ కూడా నవంబర్ 15నే ఆడియెన్స్ ముందుకు వస్తోంది. లారీ కొలిన్స్, డామినిక్ లాపైర్ అనే రచయితలు రాసిన ఫ్రీడం ఎట్ మిడ్‌నైట్ అనే బుక్ ఆధారంగానే అదే టైటిల్ తో ఈ వెబ్ సిరీస్ తెరకెక్కింది. 1947 లో అర్థరాత్రి దేశానికి స్వాతంత్ర్యం వచ్చినప్పుడు దేశం విడిపోకుండా జిన్నాతో మాట్లాడి ఆపడంలో మహాత్మా గాంధీ చేసిన ప్రయత్నాలు ఎలా విఫలమయ్యాయనే కోణంలో రాసిన పుస్తకానికి డైరెక్టర్ నిఖిల్ అద్వాని తన డైరెక్షన్ స్కిల్స్‌తో దృశ్యరూపం అందించారు. నవంబర్ 15 నుండి సోనిలివ్‌లో తెలుగు, హిందీ భాషల్లో ఆడియెన్స్‌కు అందుబాటులోకి రానుంది.

ఉషా పరిణయం

తెలుగు సినీ పరిశ్రమలో కే విజయ భాస్కర్ అనే పేరు వింటే చాలు.. ఒకప్పటి నువ్వే కావాలి, నువ్వు నాకు నచ్చావు, మన్మథుడు, మల్లీశ్వరి వంటి హిలేరియస్, రొమాంటిక్ లవ్ స్టోరీలు కళ్ల ముందు మెదలాడుతాయి. అదే డైరెక్టర్ తెరకెక్కించిన మూవీ ఉషా పరిణయం. ఈ ఏడాది ఆరంభంలోనే ఈ సినిమా రిలీజైంది. యూత్ నుండి పాజిటివ్ టాక్ సొంతం చేసుకుంది. తాజాగా నవంబర్ 14 నుండే ఈటీవీ విన్ ద్వారా ఓటిటి ప్రేక్షకుల ముందుకు రాబోతోంది.

ఇవే కాకుండా ఓటిటిలో ఆడియెన్స్‌ను ఎంటర్‌టైన్ చేసేందుకు రెడీగా ఉన్న ఇతర షోలు, సినిమాల గురించి ఇప్పుడు ఓ బ్రీఫ్ లుక్కేద్దాం.

బాలయ్య బాబుతో కలిసి అన్‌స్టాపబుల్‌ షోతో ఆహా అనిపించనున్న అల్లు అర్జున్

ఆహాలో ప్రీమియర్ అవుతోన్న అన్‌స్టాపబుల్ షోలో నవంబర్ 15న అల్లు అర్జున్ గెస్ట్‌గా రాబోతున్నాడు. ఇది ఒకరకంగా అల్లు అర్జున్ ఫ్యాన్స్‌కే కాదు.. నంద్యాలలో వైసీపీ తరపున ఎన్నికల క్యాంపెయిన్, మెగా ఫ్యామిలీతో విబేధాలు, పుష్ప 2 రిలీజ్ ఎందుకు వెనక్కి వెళ్లింది వంటి అంశాలపై ఆయనేం చెబుతారో అనే ఎగ్జైట్‌మెంట్ సర్వత్రా కనిపిస్తోంది. అందుకే ఈ షో కోసం వేచిచూసే వారి సంఖ్య కూడా భారీగానే ఉంది.