Kalki 7 Days Collections: ఆగని కల్కి కలెక్షన్ల సునామి.. ఇక ఆ ఫిగర్‌ తాకడమే ఆలస్యం..!

Kalki 2898 AD Box Office: అందరూ ఊహించినట్లుగానే కల్కి కలెక్షన్ల సునామిని సృష్టిస్తోంది. విడుదలైన తొలి రోజు నుంచే పాజిటివ్‌ టాక్‌ సొంతం చేసుకున్న ఈ సినిమా వసూళ్ల పరంగా దూసుకుపోతోంది. అత్యంత వేగంగా ఇండియన్‌ సినిమా రికార్డులను తిరగరాస్తోంది. ఇప్పటికే రూ. 500 కోట్ల మ్యాజిక్‌ను తొలి వారంతంలోనే దాటేసిన కల్కి తాజాగా మరో మైలురాయి దాటేసింది.

ఇప్పటి వరకు కల్కి ప్రపంచవ్యాప్తంగా ఏకంగా రూ. 700 కోట్లు రాబట్టింది. సరిగ్గా కల్కి విడుదలై వారం రోజులు గడుస్తోన్న విషయం తెలిసిందే. దీంతో మరో వారం రోజులు ఇదే జోరు కొనసాగితే కల్కి కచ్చితంగా రూ. 1000 కోట్ల ఫిగర్‌ను టచ్‌ చేయడం ఖాయం. ప్రస్తుతం ఎలాంటి పెద్ద సినిమాలు లేకపోవడం వచ్చే వారాంతం కూడా కలిసి వస్తుండడంతో కల్కి కలెక్షన్స్ రూ. వెయ్యి కోట్లు దాటుతుందని ట్రేడ్ వర్గాలు అంచనా వేస్తున్నాయి.

కల్కి చిత్రం రూ. 700 కోట్లను రాబట్టిన విషయాన్ని చిత్ర యూనిట్ అధికారికంగా ప్రకటించింది. దీపికా పదుకొణె ఫొటోతో కూడిన పోస్టర్‌ను ఈ సందర్భంగా విడుదల చేశారు. ఇదిలా ఉంటే కల్కి సినిమా జూన్‌ 27వ తేదీన ప్రపంచవ్యాప్తంగా విడుదలైన విషయం తెలిసిందే. నాగ అశ్విన్‌ దర్శకత్వంలో దాదాపు 4 ఏళ్లు షూటింగ్ జరుపుకుందీ చిత్రం. ప్రభాస్‌ హీరోగా తెరకెక్కిన ఈ చిత్రంలో అమితాబ్‌, కమల్‌హాసన్‌, దీపికా పదుకొణెతో పాటు మరికొందరు అగ్ర నటీనటులు నటించారు.

ఇక ఈ చిత్రానికి సీక్వెల్ కూడా ఉండనుందని చిత్ర యూనిట్‌ ఇప్పటికే ప్రకటించిన విషయం తెలిసిందే. పార్ట్‌ 2కి సంబంధించి కొన్ని సన్నివేశాలు కూడా చిత్రీ కరించారని నిర్మాత అశ్వీని దత్ తెలిపారు. ఇక సీక్వెల్‌లో కమల్‌ హాసన్‌ నిడివి ఎక్కువగా ఉంటుందన్న వార్తలు సీక్వెల్‌పై అప్పుడే అంచనాలు పెంచేస్తున్నాయి.