Prabhas: ప్రభాస్‌ 'స్పిరిట్‌' లేటెస్ట్‌ అప్‌డేట్‌.. మొదలు పెట్టేసిన దర్శకుడు..

Prabhas: బాహుబలి, సలార్‌, కల్కి తర్వాత ప్రభాస్‌ ఇంటర్నేషనల్ స్టార్‌గా ఎదిగారు. ఇప్పుడు ప్రభాస్‌ నుంచి సినిమా వస్తుందంటే చాలు ఆకాశన్నంటే అంచనాలు నెలకొన్నాయి. అందుకు అనుగుణంగానే మేకర్స్ ప్రభాస్‌ సినిమాలను ప్లాన్‌ చేస్తున్నారు. భారీ బడ్జెట్‌తో సినిమాలను తెరకెక్కిస్తున్నారు. ప్రస్తుతం ప్రభాస్‌ చేతినిండా సినిమాలతో బిజీగా ఉన్నారు.

కల్కి తర్వాత 'ది రాజాసాబ్‌' విడుదలకు సిద్ధంగా ఉన్న విషయం తెలిసిందే. మారుతి దర్శకత్వంలో తెరకెక్కుతోన్న ఈ సినిమాకు సంబంధించి ఇటీవల ప్రభాస్‌ బర్త్‌డే రోజు విడుదల చేసిన మోషన్‌ పోస్టర్‌ సినిమాపై అంచనాలు పెంచేసిన విషయం తెలిసిందే. ఈ సినిమాలో ప్రభాస్‌ రెండు విభిన్న పాత్రల్లో నటిస్తున్నారన్న విషయం స్పష్టమవుతోంది.

కాగా వచ్చే ఏడాది వేసవి కానుకగా ఈ సినిమాను విడుదల చేయనున్నారు. ఇక ప్రభాస్‌ చేతిలో ఉన్న మరో ఇంట్రెస్టింగ్ మూవీ 'స్పిరిట్‌'. అర్జున్‌రెడ్డి, యానిమల్‌ వంటి మూవీస్‌తో దేశవ్యాప్తంగా క్రేజ్‌ సంపాదించుకున్న సందీప్‌ వంగా ఈసారి ప్రభాస్‌తో పెద్ద ఎత్తున ప్లాన్‌ చేస్తున్నారు. ఇప్పటికే ఈ సినిమాకు సంబంధించి సందీప్ అధికారికంగా ప్రకటన సైతం చేశారు.

ప్రభాస్‌ ఈ సినిమాలో పోలీస్‌ ఆఫీసర్‌ పాత్రలో నటించనున్నారు. దీంతో ప్రభాస్‌ కెరీర్‌లో ఖాకీ డ్రెస్‌లో కనిపిస్తున్న తొలి చిత్రం ఇదే కావడం విశేషం. ఈ ఏడాది చివర్లో ఈ సినిమా షూటింగ్‌ ప్రారంభించే ఆలోచనలో ఉన్నారు. ఇదిలా ఉంటే తాజాగా దీపావళి పండుగ సందర్భంగా చిత్ర యూనిట్‌ క్రేజీ అప్‌డేట్‌ను ఇచ్చింది.

స్పిరిట్‌ మూవీకి సంబంధించిన మ్యూజిక్ పనులు మొదలయ్యాయని వెల్లడించింది. ఈ విషయాన్ని మ్యూజిక్ కంపోజర్ హర్షవర్ధన్‌ రామేశ్వర్ సోషల్ మీడియాలో పోస్ట్ చేశారు. ఇందులో సందీప్‌ రెడ్డి వంగా మ్యూజిక్ వింటూ కనిపించారు. ప్రస్తుతం ఈ పోస్ట్ సోషల్ మీడియాలో వైరల్‌గా మారింది. కాగా స్పిరిట్ మూవీలో కరీనాకపూర్‌, సైఫ్‌ అలీఖాన్‌ కీలక పాత్రలు పోషిస్తున్నారని వార్తలు వచ్చిన విషయం తెలిసిందే. దీనిపై త్వరలోనే అధికారిక ప్రకటన వచ్చే అవకాశాలు ఉన్నాయి.