పుష్ప 2 మూవీలో ఐటెమ్‌ సాంగ్‌కు శ్రీలీల గ్రీన్ సిగ్నల్!

Sreeleela Item Song in Pushpa 2: ఐకాన్ స్టార్ అల్లు అర్జున్, సుకుమార్ కాంబినేషన్‌లో తెరకెక్కుతున్న మూవీ పుష్ప 2. ఈ చిత్రం డిసెంబర్ 5న గ్రాండ్‌గా విడుదల కాబోతుంది. ఈ క్రమంలో సినిమా నుంచి వచ్చే అప్డేట్స్ భారీ హైప్ క్రియేట్ చేస్తున్నాయి. అల్లు అర్జున్‌తో కలిసి ఐటమ్ సాంగ్ చేసేందుకు శ్రీలీల గ్రీన్ సిగ్నల్ ఇచ్చిందన్న సమాచారం చక్కర్లు కొడుతోంది. త్వరలోనే అల్లు అర్జున్, శ్రీలీలపై ఈ ఐటెమ్ సాంగ్‌ను చిత్రీకరించేందుకు సన్నాహాలు చేస్తున్నట్టు వార్తలొస్తున్నాయి. దీంతో శ్రీలీల, అల్లు అర్జున్ స్పెషల్ సాంగ్‌లో స్టెప్పులు వేస్తే థియేటర్స్ దద్దరిల్లిపోవాల్సిందే అంటూ అభిమానులు కామెంట్స్ చేస్తున్నారు.

సుకుమార్ సినిమా అంటే స్పెషల్ సాంగ్ తప్పని సరి. ఇప్పటి వరకు ఆయన తెరకెక్కించిన పలు సినిమాల్లోని ఆ అంటే అమలాపురం, రింగా రింగా, జిగేల్ రాణి వంటి పాటలు సూపర్ హిట్ అయ్యాయి. ఇక పుష్ప సినిమాలో సమంత చేసిన ఊ అంటావా మావ.. ఉఊ అంటావా సాంగ్ గురించి ప్రత్యేకంగా చెప్పాల్సిన అవసరం లేదు. ఈ పాటతో సమంతకు నేషనల్ వైడ్‌గా ఫుల్ క్రేజ్ వచ్చింది. పుష్పరాజ్‌గా అల్లు అర్జున్ నటనకు, తగ్గేదేలే అనే ఆయన మేనరిజంకు అందరూ ఫిదా అయిపోయారు. పుష్ప 2 మూవీలో ఐటమ్ సాంగ్‌లో అల్లు అర్జున్‌తో కలిసి స్టెప్పులేయబోయే హీరోయిన్ ఎవరనే విషయంపై గత కొంత కాలంగా చాలా పేర్లు తెరపైకి వచ్చాయి. బాలీవుడ్ నటి శ్రద్ధాకపూర్‌తో పాటు పలువురు తారల పేర్లు వినిపించాయి. పారితోషికం కారణంగా శ్రద్ధాకపూర్ ఓకే చెప్పకపోడంతో చిత్రబృందం శ్రీలీలను సంప్రదించినట్టు తెలుస్తోంది.

ఇక డ్యాన్సుల విషయంలో హీరో అల్లు అర్జున్ గురించి ప్రత్యేకంగా చెప్పనక్కర్లేదు. డ్యాన్స్‌ల విషయంలో ఓ స్పెషల్ ఇమేజ్ సొంతం చేసుకున్న హీరోయిన్ శ్రీలీల.. వీరిద్దరి కాంబోలో ఓ సాంగ్ ఉంటుందంటే ఆ సాంగ్ ఎంతటి ఎనర్జీతో ఉంటుందో ఊహించుకోవచ్చు. దేవీశ్రీ ప్రసాద్ తనదైన శైలిలో మాస్ బాణీలను సమకూర్చగా.. చంద్రబోస్ ఈ ఐటమ్ సాంగ్‌కు సాహిత్యం అందిస్తున్నాడు.

శ్రీలీల తన డ్యాన్స్‌తో తెలుగు ప్రేక్షకులను మెస్మరైజ్ చేసింది. ఇప్పుడు ఎన్నో అంచనాలు ఉన్న పుష్ప ది రూల్ మూవీలో ఐటమ్ సాంగ్‌ను శ్రీలీల చేస్తుందనగానే మరింత హైప్ క్రియేట్ అయింది. మరి పుష్పలో సమంత క్రియేట్ చేసిన మ్యాజిక్‌ను.. పుష్ప2లో శ్రీలీల రిప్లేస్ చేస్తుందా అని నెటిజన్స్ చర్చించుకుంటున్నారు. పుష్ప 2లో అల్లు అర్జున్, శ్రీలీల మధ్య ఈ స్పెషల్ సాంగ్‌ను ఎలా తెరకెక్కిస్తారో చూడాలి మరి. ఇదిలా ఉంటే పుష్ప ది రూల్ చిత్రాన్ని ప్రపంచవ్యాప్తంగా ఆరు భాషల్లో కలిపి మొత్తం 11,500 స్క్రీన్‌లలో విడుదల చేసేందుకు మేకర్స్ ప్లాన్ చేస్తున్నారు. పుష్ప 2 హంగామా ఎలా ఉండనుందో తెలియాలంటే డిసెంబర్ 5 వరకు వెయిట్ చేయాల్సిందే.