Kalki: కల్కి సీక్వెల్‌పై అప్పుడే మొదలైన బజ్‌.. మ్యూజిక్‌ డైరెక్టర్ ఎవరంటే..?

Kalki: కల్కి సినిమా ఇండియన్‌ బాక్సాఫీస్‌ వద్ద ఎలాంటి వండర్స్‌ క్రియేట్‌ చేస్తోందో ప్రత్యేకంగా చెప్పాల్సిన పనిలేదు. అత్యంత భారీ అంచనాల నడుమ విడుదలైన ఈ సినిమా అదే స్థాయిలో కలెక్షన్లను రాబడుతోంది. ఇప్పటికే సుమారు రూ. 500 కోట్లకుపైగా వసూళ్లను రాబట్టిన ఈ సినిమా రూ. వెయ్యి కోట్ల దిశగా దూసుకుపోతోంది. దీంతో తొలి వారంతంలోనే కల్కి రూ. 500 కోట్ల క్లబ్‌లోకి చేరిపోయింది. ప్రస్తుతం కొత్త సినిమాలు లేకపోవడంతో వసూళ్లు మరింత పెరగడం ఖాయంగా కనిపిస్తోంది. ఇదిలా ఉంటే ఓవైపు కల్కి మేనియా కొనసాగుతుండగానే కల్కి సీక్వెల్‌కు సంబంధించిన వార్తలు ఆసక్తిని పెంచుతున్నాయి.

కల్కి సినిమాకు సీక్వెల్‌ తెరకెక్కించేందుకు మేకర్స్‌ ముందుగానే నిర్ణయం తీసుకున్నారు. ఈ విషయమై నిర్మాత అశ్వనీదత్‌ పలు ఆసక్తికర విషయాలను ఇటీవల పంచుకున్నారు. కమల్‌హాసన్ కల్కీలో భాగం అయిన రోజే సినిమాను కచ్చితంగా రెండు భాగాలుగా తీయాలని నిర్ణయం తీసుకున్నామని తెలిపారు. కల్కి 2కి సంబంధించి ఇప్పటికే కొంతమేర షూటింగ్ జరిగిందని, కొన్ని కీలక సన్నివేశాలు, వీఎఫ్‌ఎక్స్‌ పనులు పూర్తి చేయాల్సి ఉందని చెప్పుకొచ్చారు. అయితే దీనికి ఏడాది పట్టే అవకాశం ఉన్నట్లు చెప్పుకొచ్చారు.

ఇదిలా ఉంటే ప్రస్తుతం కల్కి2కి సంబంధించి ఓ ఆసక్తికరమైన వార్త నెట్టింట వైరల్ అవుతోంది. కల్కి సినిమా సంగీతం విషయంలో ప్రేక్షకులను కాస్త నిరాశ పరిచిందనే వాదన వినిపిస్తున్న విషయం తెలిసిందే. నేపథ్య సంగీతం బాగున్నా పాటలు పెద్దగా ఆకట్టుకోలేక పోయాయనే కామెంట్స్‌ వచ్చాయి. అయితే సీక్వెల్‌లో ఈ సమస్య లేకుండా మేకర్స్‌ జాగ్రత్త పడుతున్నట్లు తెలుస్తోంది. కల్కి సెకండ్‌ పార్ట్‌లో సంతోష్ నారాయణ్ కు బదులు ఆస్కార్ అవార్డ్ గ్రహీత కీరవాణిని తీసుకోవాలని ప్లాన్‌ చేస్తున్నట్లు సమాచారం. మరి ఈ వార్తలో ఎంత వరకు నిజం ఉందో తెలియాలంటే అధికారిక ప్రకటన వచ్చే వరకు వేచి చూడాల్సిందే.