వారిద్దరినీ వేధించింది ఒక్కడే!

సాంఘిక మాధ్యమాల్లో వేధింపులకు దిగడం.. రకరకాలుగా మహిళలను కించపరిచే వ్యాఖ్యలు వ్యాప్తి చేయడం సహజమైపోయింది. అలా వేధింప బడుతున్న వారి సంఖ్యా తక్కువేమీ కాదు. ముఖ్యంగా సెలబ్రిటీలు ఈ వరుసలో ముందుంటున్నారు. కొందరు ఈ విషయంలో ఫిర్యాదులు చేస్తున్నారు. కొందరు ఈ గోల ఎందుకని వదిలేస్తున్నారు.

ఆ మధ్య కాలంలో నటి పూనం కౌర్, వైసీపీ నాయకురాలు లక్ష్మీపార్వతి పైన విపరీతమైన వేధింపుల పోస్టులు వెల్లువెత్తాయి. వారు సైబర్ క్రైమ్ పోలీసులకు ఫిర్యాదులు చేశారు. వాటిని విచారించిన పోలీసులకు ఆసక్తికరమైన క్లూస్ దొరికాయి. ఈ ఇద్దరినీ వేధింపులకు గురిచేసింది ఒక్కరే అని పోలీసులకు ప్రాథమిక ఆధారాలు లభించాయి. ప్రస్తుతం నిందితుడు పరారీలో ఉన్నాడు. ఇతడితో పాటు మరో వ్యక్తి ఈ నేరంలో భాగస్వామిగా ఉన్నాడని తెలుసుకున్నారు. హైదరాబాద్‌ ఫిలింనగర్‌లోని ఒక అపార్ట్‌మెంట్‌ ఫ్లాట్‌లో వాళ్లు కార్యాలయాన్ని నిర్వహిస్తున్నారని సమాచారం సేకరించారు. లక్ష్మీపార్వతిపై ఈ ఏడాది ఫిబ్రవరి నుంచి, పూనం కౌర్‌పై గత 8 నెలలుగా అసభ్య వ్యాఖ్యలు, అశ్లీల కథనాలను పోస్ట్‌ చేస్తున్నారని పోలీసులు గుర్తించారు. డబ్బు కోసం ఇదంతా చేస్తున్నారా? వ్యక్తిగత కక్షతో చేస్తున్నారా? అనేది వారు పట్టుబడ్డాకే తెలుస్తుందని ఒక పోలీసు ఉన్నతాధికారి వివరించారు.