NCP leader Baba Siddiqui: ముంబై నడిబొడ్డున దారుణం..మాజీ మంత్రి ఎన్సీపీ నేత బాబా సిద్దిఖీ దారుణ హత్య

NCP leader Baba Siddiqui: ముంబై నడిబొడ్డున దారుణం జరిగింది. మాజీ మంత్రి బాబా సిద్ధిఖీపై కాల్పులు జరిగాయి. ఈ ఘటనలో తీవ్రంగా గాయపడిన ఆయన లీలావతి ఆసుపత్రిలో చికిత్స పొందుతూ మరణించారు. సిద్ధిఖీ బాంద్రా (తూర్పు) నుండి మూడుసార్లు ఎమ్మెల్యేగా, రాష్ట్ర ప్రభుత్వంలో మంత్రిగా ఉన్నారు. ఆయన ఈ ఏడాది ఫిబ్రవరిలో కాంగ్రెస్‌ను వీడి నేషనలిస్ట్ కాంగ్రెస్ పార్టీ (అజిత్ పవార్)లో చేరారు. ఆయన కుమారుడు జీషన్ సిద్ధిఖీ ప్రస్తుతం బాంద్రా (తూర్పు) స్థానం నుంచి ఎమ్మెల్యేగా ఉన్నారు. హత్యకు పాల్పడిన ఇద్దరు అనుమానిత షూటర్లను పోలీసులు అదుపులోకి తీసుకున్నారు. బాబా సిద్ధిఖీ మృతదేహాన్ని పోస్టుమార్టం నిమిత్తం ముంబైలోని కూపర్ ఆస్పత్రికి తరలించారు.

శనివారం రాత్రి 9.30 గంటల సమయంలో మోటారు సైకిల్‌పై వచ్చిన ముగ్గురు ముష్కరులు బాబా సిద్ధిఖీపై 6 బుల్లెట్లు కాల్చారు. అతనికి ఆరు బుల్లెట్లు తగిలాయి. బాబా సిద్ధిఖీ తీవ్రంగా గాయపడటంతో వెంటనే లీలావతి ఆసుపత్రికి తరలించారు. అక్కడ చికిత్స పొందుతూ మరణించినట్లు ప్రకటించారు. పోలీసులు అదుపులోకి తీసుకున్న ఇద్దరు నిందితులు ఉత్తరప్రదేశ్‌కు చెందిన వారని తెలుస్తోంది.

ఈ ఘటన వెనుక లారెన్స్ విష్ణోయ్ ముఠా హస్తముందని పోలీసులు అనుమానిస్తున్నారు. బాబా సిద్ధిఖీ తన రాజకీయ జీవితాన్ని మొత్తం కాంగ్రెస్ పార్టీలో గడిపారు. అయితే ఈ ఏడాది ఫిబ్రవరిలో ఆయన కాంగ్రెస్‌ను వీడి ఎన్సీపీలో చేరారు. ఆయన ఎమ్మెల్యే కుమారుడు జీషన్ సిద్ధిఖీ కూడా త్వరలో ఎన్సీపీ (అజిత్)లో చేరి వచ్చే అసెంబ్లీ ఎన్నికల్లో పోటీ చేసే అవకాశం ఉంది.

ఆయన హత్యానంతరం రాష్ట్ర ప్రభుత్వ శాంతిభద్రతల పరిస్థితిపై ప్రతిపక్షాలకు మరోసారి చురకలంటించే అవకాశం వచ్చింది. శాంతిభద్రతలకు ఉప ముఖ్యమంత్రి దేవేంద్ర ఫడ్నవీస్‌ను బాధ్యులను చేసి, ఉప ముఖ్యమంత్రి దేవేంద్ర ఫడ్నవీస్ రాజీనామా చేయాలని కాంగ్రెస్ నాయకుడు భాయ్ జగ్తాప్ డిమాండ్ చేశారు. మరోవైపు, దేవేంద్ర ఫడ్నవీస్ స్వయంగా లీలావతి ఆసుపత్రికి చేరుకుని బాబా సిద్ధిఖీ కుమారుడు జీషన్ సిద్ధిఖీని కలుసుకుని, సంఘటన గురించి పోలీసుల నుండి సమాచారం తీసుకున్నారు.