Tamilnadu : తమిళనాడులో ఘోర రోడ్డు ప్రమాదం..ఐదుగురు తెలుగు విద్యార్థులు దుర్మరణం

Tamilnadu : తమిళనాడులో ఘోరరోడ్డు ప్రమాదం జరిగింది. ఈ ప్రమాదంలో ఏపీకి చెందిన ఐదుగురు ఇంజనీరింగ్ విద్యార్థులు అక్కడికక్కడే ప్రాణాలు కోల్పోయారు. ఏడుగురు స్నేహితులు ఒకే కాలేజీలో చదువుకుంటున్నారు. రెండు రోజులు సెలవులు రావడంతో కారులు దేవాలయానికి వెళ్లి తిరిగి వస్తున్నారు. లారీ రూపంలో దూసుకువచ్చిన మ్రుత్యువు వారిని బలి తీసుకుంది. చెన్నై సమీపంలోని ఎస్ ఆర్ఎం కాలేజీలో ఇంజనీరింగ్ మూడో సంవత్సరం చదువుతున్నారు. ఏడుగురు విద్యార్థులు శనివారం కారులో తిరువణ్ణామలై అరుణాచలేశ్వరాలయానికి వెళ్లారు.

స్వామివారిని దర్శించుకున్న తర్వాత తిరిగి ఆదివారం చెన్నైకు బయలు దేరారు. వీరు ప్రయాణిస్తున్న కారు తిరువళ్లూరు జిల్లా కనకమ్మ సత్రం వద్దకు రాగానే ఎదురుగా వస్తున్న లారీ వీరు ప్రయాణిస్తున్న కారును బలంగా ఢీకొట్టింది. ఈ ప్రమాదంలో కారు నుజ్జునుజ్జు అయ్యింది.

కారులో ప్రయాణిస్తున్న ప్రొద్దుటూరుకు చెందిన సతీష్, తిరుపతికి చెందిన యుగేశ్, చేతన్, కర్నూలుకు చెందిన రామ్మోహన్, విజయవాడకు చెందిన సతీష్ ఘటనాస్థలంలోనే మరణించారు. నెల్లూరుకు చెందిన విష్ణు, ప్రకాశం జిల్లా వాసి చైతన్యకు గాయాలు అయ్యాయి. వీరిని స్థానిక ప్రభుత్వాసుపత్రికి తరలించి చికిత్స అందిస్తున్నారు. కారులో చిక్కుకున్న డెడ్ బాడీలను అతికష్టం మీద బయటకు తీశారు.