Vishwakarma Yojana: సెప్టెంబర్ 17న రానున్న మరో కొత్త ప్రభుత్వ పథకం.. ఎవరికి లాభమో తెలుసా?

Vishwakarma Yojana: ప్రధాని మోదీ ఇప్పటివరకు రైతుల నుంచి పేదల వరకు అనేక పథకాలను అందుబాటులోకి తెచ్చారు. దీంతో పాటు ఆర్థిక సాయం కూడా చేస్తున్నారు. ఈసారి చిరుద్యోగుల కోసం 'విశ్వకర్మ యోజన' ప్రారంభించనున్నట్లు ప్రభుత్వం ప్రకటించింది. ఈ పథకాన్ని ప్రారంభించే ముందు రేపు, ప్రధాని మోదీ రాష్ట్రాలు, ప్రభుత్వ రంగ బ్యాంకులు, రాష్ట్ర స్థాయి బ్యాంకర్ల కమిటీ (SLBC) సీనియర్ అధికారులతో సమావేశం కానున్నారు.

ఈ పథకం విలువ రూ.15,000 కోట్లు..

వడ్రంగి, తాపీ మేస్త్రీ, స్వర్ణకారుడు వంటి సంప్రదాయ నైపుణ్యాలు కలిగిన వ్యక్తుల కోసం ప్రధాని నరేంద్ర మోదీ ఈ పథకాన్ని ప్రారంభించారు. మీరు కూడా మీ ఆదాయాన్ని పెంచుకోవాలని ఆలోచిస్తున్నట్లయితే, ఇది మీకు మంచి అవకాశం. జీవనోపాధి అవకాశాలను పెంచేందుకు ప్రభుత్వం రూ.15,000 కోట్ల బడ్జెట్‌తో 'విశ్వకర్మ యోజన'ను ప్రకటించనుంది. ఈ పథకం సెప్టెంబర్ 17 నుంచి ప్రారంభించనున్నట్లు తెలుస్తోంది. ఈ పథకం లక్ష్యం సాంప్రదాయ కళాకారులు, హస్తకళాకారులకు సహాయం చేయడం. అలాగే ఈ పథకాన్ని మూడు మంత్రిత్వ శాఖలు - MSME, నైపుణ్యాభివృద్ధి, ఫైనాన్స్ ద్వారా అమలు చేయనున్నారు.

ప్రధానమంత్రి విశ్వకర్మ యోజన కింద ప్రస్తుత ఆర్థిక సంవత్సరంలో 3 లక్షల మందికి పైగా లబ్ధిదారులను అనుసంధానం చేయడం లక్ష్యంగా పెట్టుకున్నట్లు ఒక అధికారి తెలిపారు . నైపుణ్యాల మంత్రిత్వ శాఖ ఆగస్టు 28న సమావేశాన్ని ఏర్పాటు చేసిందని ఆయన తెలిపారు. ఇందులో రాష్ట్రాల ప్రధాన కార్యదర్శులు, బ్యాంకుల మేనేజింగ్ డైరెక్టర్లు, ఎస్‌ఎల్‌బీసీ ప్రతినిధులను ఆహ్వానించారు.

4-5 రోజులపాటు శిక్షణ..

ప్రధానమంత్రి విశ్వకర్మ యోజన ముసాయిదా అమలు, పథకం లబ్ధిదారుల గుర్తింపు ప్రక్రియపై సమావేశంలో చర్చించనున్నట్లు అధికారి తెలిపారు. ఈ పథకం కింద, నైపుణ్యం కలిగిన కార్మికులకు వారి నైపుణ్యాలను పెంపొందించడానికి 4-5 రోజుల శిక్షణ ఇవ్వనున్నారు. ఆ తర్వాత వారు రుణం తీసుకోవడానికి అర్హులవుతారు.

గ్రామీణ ప్రాంతాలపై దృష్టి..

ప్రస్తుత ఆర్థిక సంవత్సరంలో మూడు లక్షల మంది లబ్ధిదారులకు రుణాలు ఇవ్వాలని లక్ష్యంగా పెట్టుకున్నామని తెలిపారు. ఈ పథకం కింద గ్రామీణ ప్రాంతాలపై ప్రత్యేక దృష్టి సారించనున్నారు.