Tata Tiago: భద్రతో 4 స్టార్స్.. మైలేజీలోనే కాదు ఫీచర్లలోనూ తగ్గేదేలే.. ఈ టాటా కారు ధర కేవలం రూ. 5.6లక్షలే..!

Tata Tiago: టాటా మోటార్స్ కార్లు సురక్షితమైనవిగా పేరుగాంచాయి. భారతదేశంలో బాగా ప్రాచుర్యం పొందిన సంగతి తెలిసిందే. అమ్మకాల్లో దూసుకపోతున్నాయి. ఈ కారణంగా టాటా మోటార్స్ దేశంలో మూడవ అతిపెద్ద కార్ల తయారీ సంస్థగా అవతరించింది. అన్ని టాటా మోటార్స్ కార్లు బాగా ప్రాచుర్యం పొందాయి. అయితే ఇందులో ముఖ్యంగా చెప్పుకోవాల్సిన కారు కూడా ఒకటి ఉంది. దీని అమ్మకాలు అకస్మాత్తుగా 67 శాతం పెరిగాయి. ఈ కారు టాటా టియాగో హ్యాచ్‌బ్యాక్ కంపెనీకి చెందిన ఎంట్రీ లెవల్ మోడల్. ఇది కంపెనీ అత్యంత సరసమైన కారు. దీని ప్రారంభ ఎక్స్-షోరూమ్ ధర రూ. 5.6 లక్షలు మాత్రమే. గత నెలలో ఇది కంపెనీ తరపున మూడవ అత్యధికంగా అమ్ముడైన కారుగా నిలిచింది. ఏప్రిల్ 2023లో ఇది 8,450 యూనిట్లను విక్రయించింది. విక్రయాల్లో 67 శాతం వార్షిక వృద్ధిని నమోదు చేసింది.

ధర, వేరియంట్లు..

ఢిల్లీలో టాటా టియాగో ఎక్స్-షోరూమ్ ధర రూ. 5.6 లక్షల నుంచి రూ. 8.11 లక్షల మధ్య ఉంది. XE, XM, XT(O), XT, XZ, XZ+ వంటి 6 ట్రిమ్‌లు మార్కెట్లో అందుబాటులో ఉన్నాయి. ఇది మిడ్‌నైట్ ప్లమ్, డేటోనా గ్రే, ఒపాల్ వైట్, అరిజోనా బ్లూ, ఫ్లేమ్ రెడ్ వంటి 5 కలర్ ఆప్షన్‌లలో లభిస్తుంది. ఇది 242 లీటర్ల భారీ బూట్ స్పేస్‌ను కూడా పొందుతుంది.

పవర్‌ట్రెయిన్..

టాటా టియాగో హ్యాచ్‌బ్యాక్ 1.2-లీటర్ పెట్రోల్ ఇంజన్‌ను కలిగి ఉంది. ఇది 86PS పవర్, 113Nm టార్క్‌ను ఉత్పత్తి చేస్తుంది. దీనితో పాటు 5 స్పీడ్ మ్యాన్యువల్ లేదా 6 స్పీడ్ AMT గేర్‌బాక్స్ అందుబాటులో ఉన్నాయి. ఈ కారు CNGలో కూడా అందుబాటులో ఉంది. ఇది CNG మోడ్‌లో 73PS పవర్, 95 Nm టార్క్ ఉత్పత్తి చేస్తుంది. ఇందులో 5 స్పీడ్ మ్యాన్యువల్ ట్రాన్స్‌మిషన్ మాత్రమే అందుబాటులో ఉంది.

ఫీచర్లు..

టాటా టియాగో దాని ఫీచర్లకు కూడా పేరుగాంచింది. ఇది ఆపిల్ కార్ ప్లే, ఆండ్రాయిడ్ ఆటోతో కూడిన 7-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, 8-స్పీకర్ సౌండ్ సిస్టమ్, ఆటోమేటిక్ క్లైమేట్ కంట్రోల్, LED DRLలతో ప్రొజెక్టర్ హెడ్‌లైట్లు, వైపర్‌లు, కూల్డ్ గ్లోవ్‌బాక్స్, వెనుక డీఫాగర్‌ను కలిగి ఉంది.