AP News: ముందు ఎంపీలు.. ఆ తరువాతే కేంద్ర మంత్రులు.. రామ్మోహన్ నాయుడుకి చంద్రబాబు చురకలు..

Chandrababu: కేంద్ర మంత్రి కింజారపు రామ్మోహన్ నాయుడికి ఆంధ్రప్రదేశ్ ముఖ్యమంత్రి చంద్రబాబునాయుడు చురకలు అంటించారు. శ్రీకాకుళం జిల్లా ఇచ్ఛాపురంలో విద్యుత్ సబ్ స్టేషన్ ప్రారంభోత్సవ కార్యక్రమంలో స్థానిక ఎంపీ, కేంద్ర మంత్రి రామ్మోహన్ నాయుడు కన్పించకపోవడంతో చంద్రబాబు ఆరా తీశారు. మీ మంత్రి, ఎంపీకి సమాచారం ఇవ్వలేదా అని ఆయన కలెక్టర్ స్వప్నిల్ దినకర్ పుండ్కర్ ను ప్రశ్నించారు.

సమాచారం ఇచ్చానని కలెక్టర్ సమాధానం ఇచ్చారు. ఎంత బిజీగా ఉన్నా ప్రజలకు దూరం కాకూడదు... కదా... వర్చువల్ గా కూడా ఇలాంటి సమావేశాల్లో పాల్గొనవచ్చు కదా...అని ఆయన చెప్పారు. ముందు ఎంపీలు.. ఆ తర్వాతే కేంద్రమంత్రులు అనే విషయాన్ని మర్చిపోవద్దని చంద్రబాబు పరోక్షంగా రామ్మోహన్ నాయుడికి చురకలు వేశారు.

2014 నుంచి వరుసగా శ్రీకాకుళం పార్లమెంట్ స్థానం నుంచి టీడీపీ అభ్యర్ధిగా రామ్మోహన్ నాయుడు విజయం సాధిస్తున్నారు. అంతకుముందు ఇదే స్థానం నుంచి రామ్మోహన్ నాయుడు తండ్రి ఎర్రన్నాయుడు ప్రాతినిథ్యం వహించారు. 2014 ఎన్నికలకు ముందు రోడ్డు ప్రమాదంలో ఆయన మరణించడంతో రామ్మోహన్ నాయుడు రాజకీయాల్లోకి వచ్చారు. శ్రీకాకుళం నుంచి పోటీ చేసి గెలిచారు.