Melbourne Test 2024: మెల్బోర్న్ చేరుకున్న అజిత్ అగార్కర్.. రోహిత్ శర్మ రిటైర్మెంట్ గురించి కీలక వ్యాఖ్యలు

Melbourne Test 2024: గత కొన్ని నెలలుగా క్రికెట్ పరంగా చూస్తే రోహిత్ శర్మ ఫామ్ సరిగా లేదనే చెప్పాలి. ఒకవైపు తను వరుసగా బ్యాటింగులో విఫలం అవుతున్నారు. మరోవైపు కెప్టెన్సీ కూడా పూర్తిగా నిష్ఫలమైంది. మెల్‌బోర్న్ టెస్టులో కూడా అదే కనిపించింది. మొదట ఫీల్డింగ్ చేస్తున్నప్పుడు తను చాలా కెప్టెన్సీ తప్పులు చేసాడు. ఆ తర్వాత బ్యాటింగ్ చేస్తూనే తన బ్యాటింగ్ పొజిషన్ మార్చుకుని ఓపెనింగ్ కు వచ్చాడు. కానీ ప్రయోజనం లేకపోయింది. కేవలం 3పరుగులు మాత్రమే చేసి అవుట్ అయ్యాడు. అప్పటి నుంచి ఆయన భవిష్యత్తుపై ఊహాగానాలు మొదలయ్యాయి. ఇంతలో చీఫ్ అజిత్ అగార్కర్ కూడా మెల్బోర్న్ చేరుకున్నారు, రోహిత్ శర్మ రిటైర్మెంట్ గురించి మాట్లాడటానికి వచ్చినట్లు తెలుస్తోంది.

రోహిత్‌కి చివరి సిరీస్?

టీమ్ ఇండియా పేలవమైన ప్రదర్శన మధ్య, చీఫ్ సెలెక్టర్ అజిత్ అగార్కర్ మెల్బోర్న్ చేరుకున్నారు. అతను తన భవిష్యత్తు గురించి రోహిత్ శర్మతో మాట్లాడే అవకాశం ఉందని తెలుస్తోంది. భారత జట్టు మార్పుల దశను దాటుతోంది. ఒకవేళ భారత జట్టు ప్రపంచ టెస్ట్ ఛాంపియన్‌షిప్ ఫైనల్‌కు అర్హత సాధించలేకపోతే, రోహిత్ టెస్ట్ కెరీర్‌లో సిడ్నీ చివరి మ్యాచ్ అవుతుందనే ఊహాగానాలు ఉన్నాయి. కొన్ని వారాల తర్వాత ఛాంపియన్స్ ట్రోఫీ ఆడాల్సి ఉంది, ఇది వన్డే ఫార్మాట్‌లో నడుస్తోంది. టెస్టు క్రికెట్ బాధ్యతను తొలగించి టోర్నీలో స్వేచ్ఛగా ఆడేందుకు అజిత్ అగార్కర్ రోహిత్‌తో మాట్లాడవచ్చు.

ఇటీవలే ప్లేయింగ్ ఎలెవన్‌లో చోటు దక్కించుకోలేక పోవడంతో ఆ జట్టు వెటరన్ స్పిన్నర్ అశ్విన్ స్వయంగా రిటైర్మెంట్ ప్రకటించాడు. దీని తర్వాత పెద్ద దుమారం చెలరేగింది. బలవంతంగా ఈ నిర్ణయం తీసుకున్నారని వాపోయారు. ఇప్పుడు పేలవమైన ప్రదర్శన మధ్య, రోహిత్ నుండి అలాంటి నిర్ణయం కోసం టీమ్ మేనేజ్‌మెంట్ వేచి ఉంది. అయితే, పేలవమైన ఫామ్ ఉన్నప్పటికీ, ప్రస్తుతానికి విరాట్ కోహ్లీకి సంబంధించి అలాంటిదేమీ వెలుగులోకి రాలేదు. మరి రానున్న రోజుల్లో ఈ ఊహాగానాలు ఎంతవరకు నిజమవుతాయో చూడాలి.

రోహిత్ పేలవ ప్రదర్శన

రోహిత్ శర్మ నిరంతరం పేలవ ప్రదర్శన చేస్తున్నాడు. ఆస్ట్రేలియాతో జరిగిన ఈ సిరీస్‌లో అతను 4 ఇన్నింగ్స్‌ల్లో 5.5 సగటుతో 22 పరుగులు మాత్రమే చేశాడు. భారత కెప్టెన్ 3,6,10, 3 పరుగుల ఇన్నింగ్స్‌లు ఆడాడు. కాగా, టెస్టు చివరి 14 ఇన్నింగ్స్‌ల్లో అతను 11.07 సగటుతో 155 పరుగులు మాత్రమే చేయగలిగాడు. ఈ మ్యాచుల్లో కేవలం ఒక హాఫ్ సెంచరీ మాత్రమే చేయగలిగాడు. ఈ 14 ఇన్నింగ్స్‌ల్లో రోహిత్ 5 సార్లు డబుల్ ఫిగర్స్‌ను తాకగా, 10 పరుగుల వ్యవధిలో 9 సార్లు ఔట్ అయ్యాడు. ఇటీవల న్యూజిలాండ్‌తో జరిగిన టెస్టు సిరీస్‌ను 0-3 తేడాతో కోల్పోయింది. ప్రస్తుతం ఆస్ట్రేలియాతో జరుగుతున్న సిరీస్‌లో 2 మ్యాచ్‌లు ఓడిపోయింది.