Mokshagnya New Look: మోక్షజ్ఞ లుక్ మామూలుగా లేదు!

Mokshagnya New Look: నందమూరి బాలకృష్ణ (Balakrishna) వారసుడు మోక్షజ్ఞ (Mokshagna) హీరోగా సినీ ఎంట్రీ ఇస్తున్నాడు. హనుమాన్ ఫేమ్ యంగ్ టాలెంటెడ్ డైరెక్టర్ ప్రశాంత్ వర్మతో కలిసి ఓ సినిమా చేయనున్నారు. అయితే ఈ సినిమాను అధికారికంగా ప్రకటించినప్పటి నుంచి ఈ మూవీ ఎలా ఉండబోతుందా..? అని నందమూరి ఫ్యాన్స్ లో ఆసక్తి మొదలైంది. అయితే తాజాగా మోక్షజ్ఞ షూటింగ్ సెట్స్ లోకి అడుగుపెట్టి, యాక్షన్ కోసం సిద్ధమైనట్టు తెలుస్తోంది. దీనికి సంబంధించి దర్శకుడు ప్రశాంత్ వర్మ ఓ ఫొటోను పోస్ట్ చేశారు.

సాధారణ గళ్ల చొక్కా ధరించి, పొడవాటి హెయిర్, స్టైలిష్ గడ్డంతో ఉన్న మోక్షజ్ఞ.. తనని తాను అద్దంలో చూసుకుంటూ ఉన్నాడు. ఈ పిక్స్ ని సోషల్ మీడియాలో షేర్ చేసిన ప్రశాంత్ వర్మ యాక్షన్ కోసం సిద్ధమా..!. సింబా ఈజ్ కమింగ్ అనే హ్యాష్ టాగ్ ని జత చేశాడు.

ఈ ఫొటో ఇప్పుడు నెట్టింట వైరల్ గా మారింది. నందమూరి ఫ్యాన్స్ అయితే మోక్షజ్ఞ లుక్ సహజమైన తేజస్సుతో పాటు, ఆత్మవిశ్వాసాన్ని కూడా చెప్పేలా ఉన్నాయని కామెంట్స్ చేస్తున్నారు. మూవీ ఓపెనింగ్ రోజు రిలీజ్ చేసిన మోక్షజ్ఞ ఫస్ట్ లుక్ కూడా అభిమానులతో పాటు ప్రేక్షకులని ఎంతగానో ఆకట్టుకుంది.

ఇక మోక్షజ్ఞ మూవీలో హీరోయిన్ గా బాలీవుడ్ హీరోయిన్ రవీనా టాండన్ కుమార్తె రాశి థడాని నటిస్తోందని తెలుస్తోంది. ఈ యంగ్ బ్యూటీ మోక్షతో రొమాన్స్ చేయనుందని ఈ మధ్య జోరుగా వార్తలు వచ్చాయి. అయితే ఈ విషయంపై మేకర్స్ నుంచి ఎలాంటి సమాచారం లేదు.

ఈ సినిమా ఇతిహాసాల స్ఫూర్తితో సోషియో ఫాంటసీ చిత్రంగా రూపొందుతున్నట్లు సమాచారం. హనుమాన్ లానే ఈ చిత్రంలోనూ భారీ గ్రాఫిక్స్ ఉంటుందని టాక్ వినిపిస్తోంది. అలాగే ఈ చిత్రంలో హీరో బాలకృష్ణ కూడా ఓ కీలక పాత్రలో కనిపించనున్నారని ప్రచారం సాగుతోంది.

సినిమాను లెజెండ్ ప్రొడక్షన్స్‌తో కలిసి ఎస్.ఎల్. వి.సినిమాస్ బ్యానర్ పై సుధాకర్ చెరుకూరి నిర్మిస్తున్నారు. బాలకృష్ణ కుమార్తె తేజస్విని నందమూరి సమర్పిస్తున్నారు. బాలయ్య విజన్ కు అనుగుణంగా, చిరస్మరణీయంగా నిలిచిపోయేలా ఈ చిత్రం ఉంటుందని సినీ వర్గాలు చెబుతున్నాయి.

డిసెంబర్ 5న మూవీ ప్రారంభం కాబోతుందనే వార్తలు ఫిలిం ఇండస్ట్రీలో చక్కర్లు కొడుతున్నాయి. ఈ మేరకు మేకర్స్ నుంచి త్వరలోనే ప్రకటన రానుందని అంటున్నారు. ఇప్పటికే నటన, ఫైట్లు, డ్యాన్సుల్లో మోక్షజ్ఞ ప్రత్యేక శిక్షణ తీసుకున్న విషయం తెలిసిందే.