Migraine Causes: మైగ్రేన్ ఎందుకు వస్తుంది? ఈ నొప్పిని తగ్గించుకునే మార్గాలివే!

Migraine Causes: మైగ్రేన్ అంటే తలలో ఒకవైపు వచ్చే భరించలేని నొప్పి. ఇది కేవలం తలనొప్పి మాత్రమే కాదు, చాలా బాధాకరమైన అనుభవం. దీని కారణంగా బాధితులు కొన్నిసార్లు రోజుల తరబడి మంచానికే పరిమితం కావాల్సి వస్తుంది. ఎండలో ఈ నొప్పి మరింత తీవ్రమవుతుంది. సాధారణంగా మైగ్రేన్ కొన్ని గంటల నుండి ఒక వారం వరకు నిరంతరంగా ఉంటుంది. మైగ్రేన్ సమయంలో చిరాకుగా మారుతుంది.. ఏమీ చేయాలని అనిపించదు. ఈ సమయంలో పెద్ద శబ్దాలు, ఎక్కువ లైట్ నొప్పిని మరింత పెంచుతాయి. దీని నుండి బయటపడటం అంత సులభం కాదు.

మైగ్రేన్ నొప్పి నాడీ వ్యవస్థ, ధమనుల మధ్య అసాధారణ కదలికల వల్ల వస్తుంది. ఇది వాపు, రక్త ప్రవాహంలో మార్పులకు దారితీస్తుంది. మైగ్రేన్ ప్రతి వ్యక్తికి వేర్వేరుగా అనిపించవచ్చు. కొందరికి తలలో ఒకవైపు నొప్పి వస్తే, మరికొందరికి రెండు వైపులా నొప్పి రావచ్చు. కొన్నిసార్లు కళ్ళు, ముఖం, సైనస్, దవడ, మెడలో కూడా నొప్పిని అనుభవించవచ్చు.

మైగ్రేన్ రావడానికి గల ఖచ్చితమైన కారణాలు ఇంకా పూర్తిగా తెలియలేదు. అయితే, జన్యుపరమైన కారణాలు ముఖ్య పాత్ర పోషిస్తాయని మాత్రం స్పష్టంగా తెలుస్తోంది. తలనొప్పి వచ్చినప్పుడు, రక్త నాళాలలో ఉండే ప్రత్యేక నరాలు మెదడుకు నొప్పి సంకేతాలను పంపుతాయి. దీనివల్ల మీ తలలోని నరాలు, రక్త నాళాలలో వాపు కలిగించే పదార్థాలు విడుదలవుతాయి. అయితే నరాలు అలా ఎందుకు చేస్తాయనేది ఇంకా స్పష్టంగా తెలియలేదు. మైగ్రేన్‌ను ప్రేరేపించే కొన్ని ప్రత్యేక అంశాలు ఉన్నాయి. వాటిలో ఒత్తిడి ప్రధానమైనది. దీనితో పాటు హార్మోన్ల మార్పులు, నిద్రలో మార్పులు, వాతావరణంలో మార్పులు, ఎక్కువ లైట్, అధిక శ్రమ, కెఫీన్ లేదా పొగాకు, బలమైన వాసనలు కూడా మైగ్రేన్‌ను ప్రేరేపించగలవు.

మైగ్రేన్ రాకుండా ఉండాలంటే ఒత్తిడికి దూరంగా ఉండటం చాలా ముఖ్యం. అలాగే రోజుకు 7 నుండి 9 గంటలు తప్పనిసరిగా నిద్రపోవాలి. మైగ్రేన్‌ను ప్రేరేపించే అంశాలను గుర్తించి వాటికి దూరంగా ఉండాలి. కొన్ని ప్రత్యేక పరిస్థితులు లేదా ఆహారాలు కూడా మైగ్రేన్‌ను ప్రేరేపించవచ్చు. క్రమం తప్పకుండా వ్యాయామం చేయాలి. యోగా, ధ్యానం వంటి వాటిని ఆశ్రయించాలి. సమతుల్య ఆహారం తీసుకోవాలి. సరైన సమయానికి భోజనం చేయాలి. శరీరాన్ని ఎల్లప్పుడూ హైడ్రేట్‌గా ఉంచుకోవాలి. ఎక్కువ లైట్, బలమైన వాసనలు, తీవ్రమైన ఎండ, పెద్ద శబ్దాలకు దూరంగా ఉండాలి. ప్రతి రోగిలో మైగ్రేన్ పరిస్థితి వేర్వేరుగా ఉంటుంది. కొంతమంది జీవనశైలిలో మార్పులు చేసుకోవడం ద్వారా దీనిని నివారించవచ్చు. మరికొందరికి మందులు అవసరం కావచ్చు.