ఉదయాస్తమాన సేవా టికెట్ల ధరను నిర్ణయించిన టీటీడీ.. సాధారణ రోజుల్లో రూ.కోటి, శుక్రవారం రోజున రూ.1.50 కోట్లు..

TTD: శ్రీవారి ఉదయాస్తమాన సేవల టికెట్‌ ధర నిర్ణయించింది టీటీడీ. సాధారణ రోజుల్లో కోటి, శుక్రవారం రోజున కోటిన్నరగా ధర నిర్ణయించింది. సుప్రభాతం నుంచి ఏకాంతసేవ వరకు అన్నిసేవల్లో పాల్గొనే అవకాశం ఉదయాస్తమాన సేవ ద్వారా టీటీడీ అందిస్తోంది. భక్తులు ఎంచుకున్న తేదీలో 6 మందితో సేవలో పాల్గొనే అవకాశం కల్పిస్తోంది.

ఈ విరాళాల మొత్తంతో చిన్నారుల సూపర్‌ స్పెషాలిటీ ఆస్పత్రి నిర్మించనుంది. మొత్తం 531 ఉదయాస్తమాన సేవా టికెట్లను టీటీడీ అందుబాటులో ఉంచింది. ఈ టికెట్ల మంజూరుతో టీటీడీకి 6వందల కోట్ల ఆదాయం సమకూరనుంది. 2022 జనవరి రెండో వారం నుంచి టికెట్ల కేటాయింపునకు టీటీడీ ఏర్పాట్లు చేస్తుండగా ఈ నెల 23న ట్రయల్‌ రన్‌ నిర్వహించనుంది.