తన దీర్ఘకాలిక వ్యాధిని వెల్లడించి షాకిచ్చిన అగ్రహీరో

తన గురించి అన్ని విషయాలను అభిమానులతో పంచుకునే బాలీవుడ్ బిగ్‌బీ అమితాబ్ బచ్చన్ తాజాగా ఓ షాకింగ్ విషయాన్ని చెప్పాడు. తన వెన్నెముకకు ప్రమాదకరమైన క్షయ వ్యాధి సోకిందని అమితాబ్ అన్నారు. 'కౌన్ బనేగా కరోడ్ పతి' తాజా సీజన్‌లో ఓ సందర్భంగా మాట్లాడిన ఆయన ఈ భయంకర నిజాన్ని బయటపెట్టాడు.
2000వ సంవత్సరంలో కేబీసీ ప్రారంభించిన సమయంలో తనకు వెన్నుపాము సంబంధిత క్షయవ్యాధి ఉందని గుర్తించడం జరిగిందన్నారు. తరువాత తగిన చికిత్స తీసుకోవడంతో ఇప్పుడిప్పుడే దాని బారినుంచి బయటపడినట్టు తెలిపారు. ఈ వ్యాధి కారణంగా తానెన్నో ఇబ్బందులు పడ్డానని, కుర్చీలో కూర్చున్నప్పుడు ఎంతో నొప్పివచ్చేదని తెలిపారు. ఈ వ్యాధి నివారణకు చాలా మందులు వాడాల్సి వచ్చిందన్నారు. ఇటువంటి వ్యాధితో చాలామంది బాధపడుతున్నారని, దీనిపై ప్రజల్లో మరింత అవగాహన తీసుకురావాల్సిన అవసరం ఉందని అమితాబ్ తెలిపారు.