పోలీసు ఉద్యోగాలకు వయోపరిమితి పెంపు

ఇటీవల విడుదలైన పోలీసు ఉద్యోగాల భారీ నోటిఫికేషన్‌కు మూడేళ్ల పాటు వయోపరిమితిలో సడలింపు కల్పిస్తున్నట్లు తెలంగాణ రాష్ట్ర ప్రభుత్వం ప్రకటించింది. ఈ మేరకు గురువారం రాష్ట్ర పోలీసు శాఖ సవరణ నోటిఫికేషన్‌కు విడుదల చేసింది.పోలీస్ డిపార్ట్‌మెంట్, డిజాస్టర్ రెస్పాన్స్ అండ్ ఫైర్ సర్వీసెస్ డిపార్ట్‌మెంట్, ప్రిజన్స్ అండ్ కరెక్షనల్ సర్వీసెస్ డిపార్ట్‌మెంట్ అండ్ ఎస్‌పీఎఫ్(స్పెషల్ ప్రొటెక్షన్ ఫోర్స్) పోస్టులకు ఈ వయోపరిమితి పెంపు వర్తించనుంది. నోటిఫికేషన్ ప్రకారం 88, 89, 90, 91 కేటగిరీ పోస్టులకు మూడేండ్ల వయోపరిమితిని పెంచుతూ బోర్డు ఉత్తర్వులు జారీ చేసింది. దీంతో వయోపరిమితి పెంపు ఉత్తర్వుల ప్రకారం నోటిఫికేషన్‌ను బోర్డు సవరించింది. ఈ నెల 9వ తేదీ నుంచి 30వ తేదీ వరకు బోర్డు వెబ్‌సైట్‌ (www.tslprb.in) ద్వారా ఆన్‌లైన్‌లో దరఖాస్తులు స్వీకరించనున్నారు. దరఖాస్తు చేసుకునే ప్రతి పోస్టుకు కూడా వేర్వేరుగా ఫీజులు చెల్లించాల్సి ఉంటుంది.