పాటలు లేనిదే పూట గడవని ఆవు..

మడిసన్నాక కూసింత కళాపోసనుండాలనే సినిమా డైలాగు ఆ ఆవు కూడా విన్నట్లుంది. సంగీతంలో ఓలలాడుతూ తేలియాడుతోందా ఆవు. ప్రతీ రోజు పాటలు వింటూ తన దినచర్యను ప్రారంభించే ఈ గోమాత, ఆ పాటలే లేకుంటే నానాయాగీ చేస్తోంది. నిజామాబాద్ జిల్లా మాక్లూర్ మండలం కొత్తపల్లి గ్రామంలో పాటలు వినే గోమాత కథేమిటో మీరే చూడండి...!

నిజామాబాద్ జిల్లా మాక్లూర్ మండలం కొత్తపల్లి గ్రామానికి చెందిన కొల్లిపర శ్రీకాంత్ రెండేళ్ళ కిందట ఓ ఆవును కొనుగోలు చేశారు. రూ.28 వేలకు ఒంగోలు దేశవాళి ఆవును తీసుకొచ్చి పోషిస్తున్నారు. పాల వ్యాపారం కోసం తీసుకొచ్చిన ఆవు ప్రతీ రోజు ఉదయం సమీపంలోని రామాలయంలో వచ్చే పాటలను వింటూ ఆనందించేది. ఆ పాటలు వింటూనే పుష్కళంగా పాలు కూడా ఇచ్చేది. ఆ సంగీతాన్ని ఆస్వాదించినంత సేపు కడుపు నిండా గడ్డి మేసేది. ఆ పాటలు ఆగిపోయిన వెంటనే కొమ్ములాడిస్తూ, గంతులేస్తూ నానా గొడవ చేసేది.

చాలా రోజులకు ఈ విషయాన్ని గుర్తించిన శ్రీకాంత్ గోమాతకు సంగీతం వినిపించడం ప్రారంభించారు. సెల్ ఫోనులో పాటలు పెట్టి దాని చెవి దగ్గర పెట్టినపుడు ఆనందంగా తలాడిస్తూ ప్రశాంతంగా ఉండడాన్ని గమనించారు. ఆ పాటలు ఆపిన వెంటనే కొమ్ములతో కుమ్ములాటకు దిగసాగింది. అది సంగీతానికి అలవాటు పడిందని గ్రహించి ఓ సెల్ ఫోనులో ప్రత్యేకంగా మెమొరీ కార్డు వేసి, అందులో అన్నీ భక్తి గీతాలు నింపించారు. ఆ సెల్ ఫోనును ఆవు మెడకు కట్టి పాటలు వినిపించసాగాడు. అలా, పాటలు వింటున్నంత సేపు గోవు ప్రశాంతంగా ఉంటుంది. సంగీతానికి అనుగుణంగా తలాడిస్తూ, మేత మేస్తూ ఆనందంగా కనిపిస్తోంది. ప్రస్తుతం పాటలు వినడం దాని దినచర్యగా మారింది.