మరో ప్రయోగానికి ఇస్రో రెడీ

భారత అంతరిక్ష పరిశోధన సంస్థ.. ఇస్రో మరో ప్రయోగానికి సన్నద్ధమైంది. నెల్లూరు జిల్లా శ్రీహరికోటలోని భారత అంతరిక్ష ప్రయోగ కేంద్రం సతీష్ థావన్ స్పేస్ సెంటర్ నుంచి ఈ నెల 12న పిఎస్‌ఎల్‌వి సి41 ప్రయోగం జరగనుంది. ఈ రాకెట్ ద్వారా నావిగేషన్ సేవలకు సంబంధించిన ఐఆర్‌ఎన్‌ఎస్‌ఎస్-1ఐ ఉపగ్రహాన్ని రోదసీలోకి పంపనున్నారు.

జీశాట్‌6ఏ ఉపగ్రహం గల్లంతైన పది రోజుల తర్వాత భారత అంతరిక్ష పరిశోధనా సంస్థ(ఇస్రో) మరో ప్రయోగానికి సిద్ధమైంది. జీశాట్‌6ఏ వైఫల్యానికి సంబంధించిన ప్రభావం పడనీయకుండా పూర్తి శక్తియుక్తులతో పీఎస్‌ఎల్వీ-సీ41 రాకెట్‌ ద్వారా ఐఆర్‌ఎన్‌ఎస్‌ఎస్‌-1ఐ ఉపగ్రహాన్ని ఈ నెల 12వ తేదీ తెల్లవారుజామున 4.04 గంటలకు ప్రయోగించేందుకు అంతా సిద్ధం చేసుకుంటుంది. శ్రీహరి కోటలోని మొదటి ప్రయోగ కేంద్రం నుంచి దీనిని రోదసిలోకి పంపుతారని ఇస్రో తెలియజేసింది.

నావిగేషన్‌ ఉపగ్రహ శ్రేణిలో ఐఆర్‌ఎన్‌ఎస్‌ఎస్‌-1ఐ ఎనిమిదవ శాటిలైట్‌. బరువు 1425 కిలోలు. అయితే ఇక్కడ ఉత్కంఠకు దారితీస్తున్న మరో అంశం కూడా ఉంది. నావిగేషన్‌ ఉపగ్రహ శ్రేణికి చెందిన ఐఆర్‌ఎన్‌ఎస్‌ఎస్‌-1హెచ్‌ శాటిలైట్‌ను గత ఏడాది ఆగస్టు 31న పీఎస్‌ఎల్వీ ద్వారా ప్రయోగించగా... ఉష్ణకవచం విడిపోక అది విఫలమైంది. ఆ ఘటన తర్వాత కక్ష్యలోకి పంపుతున్న నావిగేషన్‌ ఉపగ్రహం ఇదే. అదీ కాకుండా జీశాట్‌6ఏ గల్లంతై నియంత్రణలోకి రాలేదు. ఈ రెండు ఘటనలను దృష్టిలో ఉంచుకుని ఇస్రో శాస్త్రవేత్తలు ఈసారి మరిన్ని జాగ్రత్తలు తీసుకుంటున్నట్లు సమాచారం.

ఈ పీఎస్‌ఎల్వీ రాకెట్‌ ప్రయోగంలో 20వ సారీ ఎక్స్‌ఎల్‌ కాన్ఫిగరేషన్‌పైనే శాస్త్రవేత్తలు నమ్మకం ఉంచారు. ఇస్రో వర్గాల సమాచారం మేరకు 12న తెల్లవారుజామున 4.04 నిమిషాలకు షార్‌లోని మొదటి ప్రయోగ వేదిక నుంచి రాకెట్ నింగిలోకి ఎగరనుంది.